गोयांत राष्ट्रीय नाट्य महोत्सवाचो जल्लोष; 15 जुलयेक ‘वंदे मातरम्’विषयार दोन विशेष नाटकांचें सादरीकरण
भारताच्या सांस्कृतिक वारशाचो गौरव, राष्ट्रीय एकात्मता आनी स्वातंत्र्याच्या भावनेचो संदेश लोकांपर्यंत पोचोवपाखातीर संगीत नाटक अकादमी, नवी दिल्ली आनी गोवा कला आनी संस्कृती संचालनालय हांच्या संयुक्त विद्यमानान 15 जुलय 2026 दिसा राष्ट्रीय नाट्य महोत्सवाचें आयोजन केल्लें आसा. महाकवी कालिदास जयंती आनी ‘वंदे मातरम्’च्या 150 व्या स्मरणवर्सानिमित्त देशभर 39 पेक्षा जास्त भाषांत हो महोत्सव साजरो जाता, जाचे अंतर्गत गोयांत दोन विशेष नाट्यप्रयोग रंगपाक वचतात.
कला अकादमीत ‘वंदे मातरम् – देश राग’चो प्रयोग
महोत्सवांतर्गत पयलें नाटक ‘वंदे मातरम् – देश राग’ 15 जुलयेक सांजे 6.30 वाजता कला अकादमी, पणजी हांगा सादर जातलें. ह्या नाटकाचें लेखन आनी दिग्दर्शन युगांक नायक हाणें केलां आसून नॉलेज टर्मिनस अँड आर्टिस्ट्स कलेक्टिव्ह, फोंडा ह्या संस्थेर्फें ताचो प्रयोग सादर जातलो.
फोंड्यांत रंगटलें ‘वंदे मातरम् – वीर धर्म’
त्याच दिसा सांजे 6.30 वाजता राजीव गांधी कला मंदिर, फोंडा हांगा ‘वंदे मातरम् – वीर धर्म’ हो नाट्यप्रयोग रंगटलो. ह्या नाटकाचें लेखन पुरुषोत्तम मर्दोळकर हाणें केलां आसून दिग्दर्शन कलानंद कामत बांबोळकर हाणें केलां. अंतरूज घुड्यो, बांदोरा-फोंडा ह्या संस्थेर्फें हो प्रयोग सादर जातलो.
देशव्यापी सांस्कृतिक उपक्रमाचो भाग
संगीत नाटक अकादमीकडेन आयोजित केल्लो हो राष्ट्रीय नाट्य महोत्सव देशांतल्या विविध भाषा, संस्कृती आनी परंपरांक एकाच व्यासपीठार हाडटा. रंगभूमीच्या माध्यमान राष्ट्रीय एकात्मता, देशभक्ती आनी सांस्कृतिक वारशाचो संदेश समाजाक दितलो.
नाट्यरसिकांक उपस्थित रावपाचें आवाहन
गोवा कला आनी संस्कृती संचालनालयान नाट्यप्रेमी, विद्यार्थी आनी सर्वसामान्य नागरिकांक ह्या विशेष नाट्यप्रयोगांक उपस्थित रावून ह्या ऐतिहासिक राष्ट्रीय उत्सवाचो भाग जावपाचें आवाहन केलां आसा.
